- يا زين الرجال
- يا ولد بلادي
- عليك كنادي
- يا زين الرجال
- يا اللي في البال
- عليك ضربت الفال
- نويت والفال قال
- بلي انت بو لعيال
- تخيلتك قدامي
- شفتك في منامي
- وقلت في كلامي
- ها زهري ها تخمامي
- تزاد ترعادي
- تزاد تنهادي
- طلعت انت بو ولادي
- بان نور زال ظلامي
- تزاد حبي وغرامي
- عفاك ما تكونش
- سباب نكادي
- راه أصلك
- حتى فصلك
- من اجدادي
- انا ليك عروسة
- انا ليك محروسة
- بلا بيك ولد بلادي
- حياتي منحوسة
- بلا بيك متعوسة
- معاك يكمل رجاي
- ويكمل مرادي
- قلبي هواك وبغاك
- معاك ندق اوتادي
- يا عزري مالك تبري
- أنا حداك فين غادي
- معاك أنت ،
- نولد ونربي أولادي
- أجي دق باب دارنا
- مالك تخمم
- قول بسم الله
- واقرا الفاتحة
- ما تفكر ما تهز هم
- كون معقول
- جيب عدول
- تقدم دير النية
- الزواج قسمية
- هاك يدي لمحنية
- ركب الخاتم
- لازم تزعم
- القدر حكم
- لزواجي تقدم
- حصن نفسك
- راك مومن ومسلم
- صون عرض الناس
- وعيش سالم
- النزوة حرام ،
- وخا سبابها غرام
- ولحلال ، حلال
- على سير الدوام
- النزوة زلة وعلة
- وبها يتخلط الدم
- والزينة رذيلة
- تمارسها تندم
- انت زين الرجال
- انت ولد بلادي
- بك يكمل رجاي
- يتحقق مرادي
- تحت سقف بيتك
- بغيتك تكون
- حديث وسادي
- بغيتك تكون
- جد احفادي
- يا زين الرجال
- يا ولد بلادي
- محمد المؤذن مؤسس جمعية كازابلانكا للتراث الشعبي - المغرب
الأربعاء، 25 أكتوبر 2017
يا زين الرجال*****محمد المؤذن مؤسس جمعية كازابلانكا للتراث الشعبي - المغرب
الاشتراك في:
تعليقات الرسالة (Atom)
ليست هناك تعليقات:
إرسال تعليق