البشر الوان// الشاعر / رمضان فؤاد أبو الوفا

البشرألـوان
وشوش وشوش وشوش
من غير رتوش بتبان
من غير قناع  دفيان
الطيبة أصل لكل وش
بس الطباع ألوان 
أصل البشرألوان
*********
فيه لون بيبرق ويرهج 
ولون معتم جبان
ولون ضروري بيظهـر 
ولون مالوش ألوان
ولون بيعرف إلهه 
ولون بينسا الحنان
والخاين أكيد يا إخونا 
من الرخيص الجبان
أصل البشرألوان
*********
فيه لون بيتقلب   
ولون بيشقلب
ولون ما لوش معنا   
ف كتير من الأحيان
أصل البشرألوان
**********
فيه وش زاهي ومبتسم 
والضحكة صافية بتترسم
والشر داير يتقـسم
بين العيون  يتحسم
أصل العيون ألوان
أصل البشرألوان
*********
ووش مرسوم بالقلم 
ووش منحوت بالألم
ووش مكشوف 
ووش مكسوف
ووش معروف بالكرم
أصل الوشوش ألوان
أصل البشرألوان
**********
إحسب حساب المسألة 
تلقى البلاوي متلتلة
حِمل الولايا مشكلة 
أصل الحقيقة معضلة
بس المعضلات ألوان
أصل البشرألوان
*********
إملا جرادل م الهنا 
وإعلن ليالي السلطنة
وإسرق  وإنهب  مننا 
وإوعا تبص ف وشنا
ويوم م تيجي عـنـدنا 
هـ نفرقك هنا أو هـنا
أصل الفروق ألوان
أصل البشرألوان
********** 
إعرف مواسم للزعل 
وإهرب تملي من العلل
ميل وحمل يا جمل 
وإضرب حصانك يتعدل
أصل الخيول ألوان
أصل البشر ألوان
********* 
إلبس مداسك يا ولد
وإعرف دا شايب أم ولد
وإحفظ كلامك للولد
تحفظ مقامك م الهـدد
أصل الولاد ألوان
أصل البشرألوان  
*********
إن كنت شاطر إكتشف 
لية ف المشاكل تتحدف
وإن كنت عارف إختلف 
وإن كنت خايف تختلف
يبقا الخلاف ألوان
أصل البشرألوان
*********
ف ناس بتتقلب
والساعة تتشقلب
وأدنيا بنجرب
ف كتير من الفتيان
وآدي البشر ألوان
أصل البشرألوان
*********
وإسمعنا ورأينا
العقل كان زينا
وأدنيا لفينا
ف كتير من البلدان
أصل البشر ألوان 
*********
ولكل شئ معنا
يمكن يمتعنا
ويمكن يزعلنا
ف كتير من الأحيان
وآدي الزعل ألوان 
اصل البشر ألوان
*********
إللي نسى صاحبه
واللي هجر أهله
واللي يبيع نفسه 
وإللي يبيع وطنه
لكتير من الأعيان
باين عيان تبيان 
حتا العيان ألوان
أصل البشرألوان
*********
الشاعر / رمضان فؤاد أبو الوفا
عضو إتحاد كتاب مصر