خبرني اعليك الامان----سلام يحيي

خبرني اعليك الامان----
-------
يا سرب ليمام
خبرني عليك لمان
قال لك الحب ولهوى ولغرام
هي غير خطة ومناورة والسلام
اعلاش اقضاو على بدر النيام
واش ما سمعو
على اللي اقتل الروح احرام
يا سرب ليمام
وجهني
فين نلقى السلام
الليل ومطال عليه حالم
وبالنهار نرجع نادم
وعليه ضيعت لكثير من الاوراق والاقلام
يا سرب لحمام
قالولي عليك
سفير
وصورتك اتحرك الضمير
الله الله
طرتي وعلليتي فوق لغمام
وطارت معاك الاحلام
واترشات الركايز وسقطات الاعلام
ولفساد انشر اغبارو واكتر الاجرام
ولكساد صار بالاكوام
يا سرب ليمام
قل ليا
اعلاش العملاق ارجع قزام
والخادم اصبح حكيم الحكام
ولكذوب اغمر قنوات الاعلام
والصورة اتغيرات هاد الاعوام
يا سرب لحمام
كثرات الرموز
والعديان بارزين في التمثيل والافلام
وباغيين ايجيبو للشعوب التمام
بيني وبينك
رمزك باقي ديما في الامام
خمم وزيد  تخمام
التغيير راني شامم ريحتو هاد الايام
يا سرب ليمام
راحنا اعيينا من لكلام
ابغينا القنديل اينور فالظلام
باش انزيدو للقدام
ودورنا هو الصبر والصيام
يا سرب ليمام
قولو القايد الهمام
لا ثقة في الغلام
راه الى اكبر يرجع حجام
واحنا باغيين السلام
يبقى على الدوام
لمراحلي محمد
فاس